Imaxe dunha exposición de Paco Pestana en Lalín en 2019.
Na mañá deste mércores 13 de outubro celebrábase en Lugo o acto de despedida a Paco Pestana. O multifacético creador, coñecido sobre todo polo seu labor escultórico, falecía de xeito repentino este luns 11 na Cidade da Muralla aos 72 anos. Nado en Castroverde, o artista, de formación autodidacta, desenvolveu unha obra na que a raizame popular se mesturaba con elementos surrealistas e na que destacou o uso de obxectos cotiás e o emprego da madeira como material. A provocación e a sorpresa caracterizaron o seu traballo, tanto nas artes plásticas como no seu labor literario e nas súas aparicións públicas.
O falecemento de Pestana motivou múltiples mostras de pesar no mundo cultural do país. Deputacións, Concello de Lugo, a Asociación de Amigos do Patrimonio de Castroverde e múltiples persoeiros das artes e das letras do país amosaron o seu pesar polo pasamento de quen era un personaxe moi querido na cidade de Lugo. Segundo lembra a súa biografía no web da Colección de arte Afundación, da que fai parte, Pestana "é un exemplo claro da mestura entre obra e artista; resultan inseparables. Ao longo da súa traxectoria participa en destacadas exposicións en territorio español e estranxeiro, e pode ser considerado como un dos artistas máis recoñecidos nos últimos trinta anos en Galicia".
 (002).jpg)
