Falece o artista vigués Luís Torras aos 111 anos

Só había uns meses que deixara de pintar, e este domingo 14 de xaneiro falecía Luís Torras aos 111 anos de idade. Nado en Vigo o 29 de decembro de 1912, Torras desenvolveu unha longa carreira pictórica con obras no Museo Reina Sofía de Madrid, nas coleccións de Afundación e do Centro Galego de Arte Contemporánea ou no Museo de Pontevedra. Estaba considerado o decano das artes plásticas do noso país.

A Casa das Artes de Vigo acolle unha grande parte da súa produción, logo de doar ao Concello medio cento de obras. Profesor de debuxo da Escola de Artes e Oficios de Vigo desde 1954, o seu maxisterio deixou pegada en xeracións de viguesas e vigueses. O falecemento de Torras prodúcese só uns meses despois do da súa dona, María Jesús Incera, aos cen anos. Por expreso desexo do artista, non se celebrarán actos públicos de despedida.