Manuel Segade, proposto como novo director do Museo Reina Sofía

Manuel Segade (A Coruña, 1977) será o novo director do Museo Nacional Centro de Arte Reina Sofía (Madrid), a institución máis destacada do Estado no ámbito da arte contemporánea. Segade foi o candidato mellor puntuado durante o proceso concursal polo que se convocou esta praza e o ministro de Cultura, Miguel Iceta, proporá o seu nome como director do Reina Sofía no Consello de Ministros. Segade é licenciado en Historia da Arte pola USC e foi comisario xefe do Centro Galego de Arte Contemporánea (CGAC) entre 2007 e 2009. Na actualidade era director do Centro de Arte Dos de Mayo, en Móstoles.