Paco Pestana protagoniza a nova exposición da Fundación Granell

Co título Paco Pestana. O curto voo dun paspallás, a exposición Granell abría este 1 de febreiro unha exposición antolóxica deste artista de Castroverde falecido en 2021. Cristina Carballedo comisaría esta proposta na que se presentan quince esculturas, na súa maior parte en mans privadas, ademais de debuxos e escritos do autor. O proxecto poderá visitarse na sede compostelá da entidade ata o vindeiro 31 de marzo.

Segundo explica a Fundación, a mostra "parte de revisitar o proxecto plástico e vital do artista Paco Pestana, a través dunha aposta expositiva que xira arredor de obras, documentación e outros elementos do artista, que se atopan en coleccións particulares tentando amosar a intensa personalidade deste artista nun percorrido pola arte e través da amizade". Antes do que unha exposición antolóxica, o proxecto pretende ser "un roteiro emocional por pezas de persoas que compartiron amizade, traballo, experiencias ou proxectos co artista".

Neste sentido, diferentes documentos sobre este creador e dous vídeos de Eloy Lozano completan a parte máis artística a obra a retratar a Pestana. Con esta iniciativa a fundación pretende "reivindicar o traballo dun artista fundamental na plástica contemporánea galega que sentou conceptos que seguen funcionando como base de novas achegas as xeracións actuais". Ademais, reivindica a conexión do autor coa propia entidade, coa que mantivo unha estreita relación e onde xa protagonizara unha exposición no ano 2000 ademais de diferentes publicacións.