O festival Plataforma suma localizacións na súa terceira xeira

Cunha ampliada rede de espazos e de entidades colaboradoras, o Festival de Artes Performativas Plataforma chega á súa terceira edición en Santiago de Compostela. Entre os vindeiros 9 e 18 de xuño lugares emblemáticos da cidade como a Praza do Obradoiro, San Martiño Pinario, a Praza do Toural, o Parque de Bonaval, o Barrio de Vite, a Fundación DIDAC, o Teatro Principal, o Auditorio de Galicia e o CGAC acollen as propostas deste proxecto que "baixo o fío da performatividade quere tender pontes entre as artes visuais e as artes vivas, a música, a arquitectura, a poesía e outras disciplinas culturais".

O programa conta con nomes destacados como Marta Pazos, Berio Molina ou Rosana Antolí que presentarán novos traballos escénicos nas salas do CGAC na mostra "O museo como escenario". Misha Bies Golas e Benxamín Otero, pola súa banda intervirán no Auditorio de Galicia cunha proposta que musica patróns téxtiles. Canda a eles, Ana Gesto estreará unha performance percorrendo co público o Barrio de Vite, Irene Grau e Alberto Odériz presentarán o seu proxecto no Parque de Bonaval e Cristina V.Miranda dará a coñecer o seu proxecto de poesía e música en colaboración con Auto Sacramental.

Chus Pato lanzará no encontro a súa creación inédita sobre os cadernos do artista Rodríguez-Méndez, que á súa vez durante o evento producirá as pezas seleccionadas pola poeta. Entre os nomes do programa atópanse artistas do país cun amplo recoñecemento internacional como son Daniel García Andújar ou Patricia Esquivias.

A Cooperativa Performa organiza este evento, dirixido por David Barro, Mónica Maneiro e Iñaki Martínez Antelo que aposta pola produción propia e as encargas específicas. Deste xeito, abundan no programa as estreas absolutas. Nesa liña enmárcanse outras colaboracións presentes nesta xeira, como as que desenvolven Macarena Montesinos coa Banda Municipal de Música, Pálida con MIL111 e mais María Salgado e Fran MM Cabeza de Vaca.