Todo listo para a un décimo aniversario espectacular do Portamérica

O festival Portamérica xa ten todo preparado para comezar o mes de xuño cunha edición, a décima, de gran valor polo que supón de volta total á normalidade, de nova etapa con cambios e de celebración dun décimo aniversario. A Azucreira de Portas será un dos tres escenarios onde terá lugar o festival entre os días 2 e 5 de xuño, xunto á carballeira e o recinto da Tafona en Caldas de Reis. O evento promovido desde Esmerarte buscará unha volta espectacular este ano, para o que trae como grandes novidades, anunciadas estes días, a celebración de concertos en "sesión vermú", que sairán do recinto do festival para facer presente o evento no centro de Caldas e na súa famosa sección gastronómica "Showrocking" dirixida polo chef Pepe Solla engadirá tamén unha nova sección de repostería entre as achegas dos preto de corenta chefs galegos, do resto do Estado e do mundo que suman 24 estrelas Michelin.

No eido musical, PortAmérica arrancará o 2 de xuño con Lori Meyers, Delaporte, El Columpio Asesino, Muchachito Bombo Infierno, Natalia Lacunza, Rojuu, Cápsula, Fon Román, Grande Amore. O venres 3 de xuño actuarán WOS, Rozalén, Baiuca, Andrés Suárez, Instituto Mexicano del Sonido, Coque Malla, Arde Bogotá, Alice Wonder, La La Love You e The Parrots. E o sábado 4, Bizarrap, Xoel López, Viva Suecia, Mikel Erentxun, Depedro, Queralt Lahoz, Lisandro Aristimuño, Amparanoia, Dengue Dengue Dengue, Serbia, Dani e Flecha Valona. As sesións vermú terán lugar durante as mañás do sábado e do domingo do festival na área termal da Tafona, un espazo a carón do Río Umia en Caldas. O sábado 4 contará coa música de Marilia Monzón, Marisa Valle Roso, Santi Araujo e Pablo Lesuit e o domingo 5 con Mavica, Sarria e os caldenses Igloo.

Festival en igualdade
Ao igual que no resto dos Rías Baixas Fest, PortAmérica contará coa participación dunha das mozas mentorizadas no programa de empoderamento do talento musical feminino da provincia Descúbreas, que a Deputación desenvolve con Regalamúsica. Amais, a institución volverá desenvolver as súas campañas de igualdade, coa presentación dun novo audiovisual e co reparto dos materiais de "Lembra! Eu decido, ti respectas" e "Conta comigo, eu respéctote" no posto que levará aos festivais. Haberá liñas de autobuses dispostas pola organización para a acudir ao festival desde 6 das principais cidades galegas (A Coruña, Santiago, Pontevedra, Cambados, Vilagarcía e Vigo).