O Hub audiovisual convoca as axudas para o desenvolvemento de videoxogos

Apoiar novas producións de videoxogos en todo o seu proceso de creación, deseño e programación, así como de comercialización, distribución e difusión, na fase de prototipo. Este é o obxectivo da convocatoria de axudas que publica o Diario Oficial de Galicia deste 20 de xuño. A liña, dotada con 500.000 euros nace ao abeiro do Hub Audiovisual da Industria Cultural e como parte das medidas do apoio ao sector do ocio interactivo no marco do Fondo Europeo de Desenvolvemento Rexional (Feder) dentro do eixe REACT-UE.

As axudas, que teñen aberto o prazo de solicitude ata o 20 de xuño, contan con dúas modalidades, unha para proxectos de máis de 200.000 euros e outra para propostas entre os 40.000 e os 200.000 euros. A primeira dos liñas financiará ata o 25% do gasto subvencionable, cun límite de 100.000 euros por axuda, mentres a segunda cubrirá ata o 75% de cada proxecto cunha contía máxima de 50.000 euros. A previsión e que ao abeiro destes fondos se desenvolvan un mínimo de oito proxectos ata o 1 de xullo de 2023.