Unha das propostas máis orixinais das conmemoracións sobre María Casares polo seu centenario, a obra teatral Continente María, chega este 19 de maio a Compostela despois de se estrear o día 16 na Coruña. O proxecto, unha coprodución do Centro Dramático Galego (CDG) con Ainé Producións e o Concello da Coruña, parte dun texto de Marianella Morena e conta coa dirección Tito Asorey, o traballo actoral de Melania Cruz e a música ao vivo do pianista Vadim Yukhnevich.
O proxecto preséntase como "un canto ao teatro e á vida a través do diálogo coa extraordinaria figura de María Casares. Presenta a actriz como o mapa dun continente a percorrer gozando dos detalles da súa paisaxe chea de vitalidade e ganas de vivir". Logo da estrea, o Salón Teatro de Compostela acollerá a montaxe ata o vindeiro 29 de maio.
