Foto: Aigi Boga
O vindeiro 29 de setembro terá lugar a estrea de ' Recortes, caneos e outras formas de driblar', a nova coprodución do Centro Dramático Galego e a produtora Ainé que ven de iniciar os ensaios e que xa ten nomes propios. Baixo a dirección de Tito Asorey, o espectáculo creado cunha dramaturxia de José L. Prieto a partir da investigación do xornalista Nacho Carretero sobre a cara oculta do fútbol, ofrecerá un percorrido lúdico, crítico e musical polo mundo deste deporte. O elenco está conformado por Manuel Cortés, Christian Escuredo, Xoán Fórneas, Isabel Garrido, Xosé A. Touriñán e Sergio Zearreta. O equipo conta tamén con Sara Rey na asistencia á dirección, Vadim Yukhnevich na composición musical, José Faro Coti a cargo do espazo escénico, Laura Iturralde no deseño de iluminación e audiovisuais, Laura Baena no de vestiario e Rosa Moledo no asesoramento lingüístico. Con este espectáculo arrancará no Salón Teatro de Santiago a nova temporada 2022-2023 da unidade teatral da Xunta de Galicia, que contará con outras dúas producións.
