'A lúa vai encuberta' xa ten xira galega con catorce paradas

A obra de teatro 'A lúa vai encuberta' ven de presentar un primeiro avance dunha extensa xira que xa ten datas no 2022. A montaxe dirixida por Tito Asorey é unha coprodución das compañías Incendiara e A Quinta do Cuadrante con Casa Museo Manuel María, CDG e MITFC, co patrocinio das Deputacións de Ourense, A Coruña e Lugo. 'A lúa vai encuberta' conta con Tito Asorey, Melania Cruz, Davide González, e Vanesa Sotelo como intérpretes e coa dramaturxia de Vanesa Sotelo, que foi a gañadora do IIº Certame Manuel María de Producións Teatrais con este texto baseado nunha obra homónima e nunca representada do escritor chairego Manuel María. A orixinal escribíraa Manuel María en 1977 para que fose levada a escena pola Agrupación Cultural Auriense, feito que non chegou a suceder.

O calendario agora presentado para a xira , tras da súa estrea en Ourense, inclúe ata catorce paradas, comezando o vindeiro 25 de setembro en Verín e seguindo por Vilalba, Pontevedra, Santiago de Compostela (onde estará tres días no Salón Teatro), Barbadás, de novo Ourense, Betanzos, Lugo, Carral, Noia e, xa no 2022, Ribeira, Cangas, Arteixo e Culleredo. Segundo a presentación, a peza céntrase na realidade galega e na loita incesante por conformar unha identidade propia, confrontándonos co noso pasado recente e as súas contradicións, desvelando un discurso que hoxe en día está sendo, senón ocultado, moitas veces silenciado e que explica, en certa maneira, as razóns de por que hoxe en día o noso país ten os trazos políticos, sociais e económicos que o caracterizan.