As actividades polo Día dos Museos prolónganse ata a fin de semana

Visitas guiadas, obradoiros, música, proxeccións e propostas de todo tipo conmemoran este 18 de maio o Día dos Museos. Os centros deste tipo no país desenvolven unha intensa axenda que se prolongará en moitos casos ata a fin de semana vindeira, cando se celebrará a Noite dos Museos. As xornadas de portas abertas, con entrada gratuíta, son un denominador común da data de hoxe nos museos galegos.

A maiores, desde a Xunta de Galicia anuncian unha batería de actos de conmemoración que queren achegar estes espazos aos públicos. Deste xeito, o Museo Centro Gaiás, na Cidade da Cultura de Galicia. Organiza visitas guiadas que permitirán coñecer zonas restrinxidas das instalacións e curiosidades deste espazo cos títulos Baixo pel do museoe Gaiás secreto.

No Museo de Belas Artes da Coruña, pola súa banda, desenvólvense visitas musicadas ao longo de todo o día, e para o sábado 21, coa Noite dos Museos, estas acompañaranse de obradoiros para familias e un concerto de soul. A coincidir coa celebración, o Museo do Mar de Vigo inaugura o día 19 a exposición de fotografía histórica O Camiño Portugués. Lembranzas de mar e pedra, que se puido ver anterioremente na Cidade da Cultura.

Tamén o Museo das Peregrinacións aproveita para abrir mostra fotográfica, neste caso, Percorrer o tempo. Esta mostra itinerante centrada en visións contemporáneas sobre o Camiño de Santiago, abrirá as súas portas no centro o venres 20 acompañada de obradoiros e unha conferencia.