Os museos de Galicia, preparados para celebrar a súa festa

Non todo vai ser Día das Letras a vindeira semana. O 18 de maio, o Día Internacional dos Museos concentrará un bo feixe de actividades por todo país. Para comezar, non se pode esquecer que a entrada será de balde en todos os centros deste tipo. A maiores, moitos deles celebran xornadas de portas abertas e complementan a súa oferta habitual con outro tipo de propostas. Visitas guiadas, proxeccións ou mesmo concertos como o que acolle o 15 de maio o Museo Etnográfico de Ribadavia. As celebracións prolongaranse alén do propio 18 coa Semana dos Museos, e o día 21 moitos destes espazos acollerán tamén propostas a conmemorar a Noite dos Museos. Ademais dos espazos dependentes da Xunta, tamén a Rede Museística da Deputación de Lugo presentou o seu propio programa de actividades.