Visitas gratuitas e actividades celebran o Día dos Museos por todo o país

A celebración do Día dos Museos está a motivar que este 18 de maio, como cada ano, estea cheo de actividades culturais promovidas desde estes espazos. Baixo o lema internacional deste ano Museos e historias controvertidas: Dicir o indicible nos Museos estes espazos abren hoxe as súas portas de balde, e ademais ofertan en moitos casos actividades que convidan a reflexionar sobre o propio papel dos museos na sociedade. En Compostela, o Museo das Peregrinacións e de Santiago, o Museo do Pobo Galego, o Centro Galego de Arte Contemporánea (CGAC), a Fundación Eugenio Granell, o Museo Pedagóxico de Galicia (MUPEGA), o Museo da Catedral e o Museo Casa da Troia celebran conxuntamente a data cunha serie de actividades compartidas. Algúns, como o do Castro de Viladonga, o de Belas Artes da Coruña ou os centros de Rede Museística da Deputación de Lugo, amplían o seu horario nesta data para celebrar así a Noite dos Museos.

No caso de Vigo, os museos municipais convidan a coñecer ata domingo as "historias controvertidas"de cada un deles a través de paneis informativos, visitas guiadas e concertos. Na Coruña, o Museo de Arte Contemporánea acollerá, entre outras propostas, unha mesa redonda sobre o tema Os museos: instrumentos de reconciliación coa participación de Jacobo Bugarín, María Peña Lombao, Ania González e Olga Osorio. As propostas prolónganse alén desta data, e a Cidade da Cultura concentra as súas actividades no vindeiro día 20, cunha exposición de 33 cadeiras creadas por alumnos de deseño de Galicia baixo o título Artesáns da madeira: as novas xeracións e unha sesión vermú.