O Día dos Museos achega propostas á axenda cultural durante toda a semana

O Día dos Museos celébrase este venres 18 con xornadas de portas abertas e actividades en centros deste tipo espallados por todo o país. Co lema Museos hiperconectados: novos enfoques, novos públicos a xornada chama a explorar as oportunidades que achegan as novas tecnoloxías para estes espazos. A celebración anticípase e prolóngase cun intenso programa que xa está en marcha e que comprende propostas que chegan á vindeira fin de semana. Os Museos de Santiago (Fundación Granell, Museo do Pobo Galego, Casa da Troia, CGAC, Museo das Peregrinacións, MUPEGA, Museo de Historia Natural e Museo da Catedral) presentaban onte as iniciativas que desenvolven arredor desta data e que inclúen visitas guiadas, obradoiros, contacontos ou presentacións. O web Museos de Galicia acolle unha completa axenda as propostas que centros de todo o país desenvolven arredor desta celebración.

A coincidir coa data presentábase onte no Centro Galego de Arte Contemporánea o ciclo Música e arte. correspondencias sonoras que hoxe mesmo celebra a súa primeira actuación neste mesmo espazo. Magnetismo un concerto que utiliza elementos teatrais e visuais a través das obras de Teresa Treccozzi e Giovanni Santini abre o programa ás oito da tarde de hoxe. O programa inclúe 13 obras de autores de música contemporánea procedentes de Alemaña, Arxentina, Canadá, Colombia, España, Estados Unidos, Israel, Italia, México e Rusia nas que se integran música e arte contemporánea.

Na Cidade da Cultura apostan por visitas guiadas en trece modalidades diferentes (familiares, online, maratón de visitas, nocturnas ou arquitectónicas entre outras) ademais de obradoiros de retrato fotográfico, xestión de museos ou un photocall entre outras propostas. Na Coruña tamén complementan as xornadas de portas abertas con propostas como un espectáculo de improvisación teatral, visitas exprés ou obradoiros de arqueoloxía.