Unha xornada analiza a prehistoria e romanización do Courel

A serra do Caurel é abundante en castros e restos de minería antiga. O vindeiro 25 de marzo celébrase a V Xornada de Divulgación Científica do Patrimonio Arqueolóxico Lucense, desta volta centrada na serra do Courel. O obxectivo é estudar o poboamento prehistórico e romano do Courel, a economía de explotación mineira, a relación entre as comunidades existentes e a presenza romana entre outras cuestións. A xornada contará coa participación de Aurora Grandal, que disertará sobre os ósos atopados nas covas da zona e o que significan. O arqueólogo Luis Francisco López analizará os modelos de ocupación castrexa na serra e Enrique Alcorta e M.ª Ofelia Carnero estudarán un dos obxectos máis senlleiros localizados na zona, a Tabula hospitalis. A xornada conta con outras actividades complementarias. A inscrición está aberta.