Fotografía do Facebook de Carlos Lorenzo Pérez
A Asociación Galega de Profesionais da Xestión Cultural escolleu en asemblea este 14 de marzo o seu novo presidente. Carlos Lorenzo Pérez, que desempeña o cargo de Técnico de Cultura do Concello de Carral, será o máximo representante da entidade a partir de agora. Lorenzo substitúe no posto a Pilar Portela, que ocupou o cargo desde o 2019 ata 2022, e abandona o cargo de secretario, que desempeñaba ata o de agora.
Portela foi nomeada o pasado mes de febreiro como coordinadora do Departamento de Música e Danza da Axencia Galega das Industrias Culturais. A asemblea da Asociación agradeceu o traballo que desenvolveu no seu mandato, así como o de Fátima Teixeiro, tesoureira, que tamén cesou nas súas funcións no colectivo.
Lorenzo, nado en 1968, ten unha ampla carreira no campo da fotografía e do audiovisual, con obras como o libro No interior do abandono ou o documental sobre poesía Vértice de versos.
