A coincidir coa celebración do primeiro aniversario do falecemento do historiador Xosé Ramón Barreiro, a Real Academia Galega organiza unha homenaxe ao que foi o seu presidente. Este 17 de marzo, a partir das 17 horas, a sede da RAG na Coruña acollerá o evento, no que tamén participan a Universidade de Santiago de Compostela e mais o Consello da Cultura Galega.
No encontro, que terá entrada libre e se retransmitirá no Youtube da RAG, Ramón Villares trazará o perfil biográfico do homenaxeado. Canda a el, o académico Pegerto Saavedra, Xosé Ramón Rodríguez Lago, Ana Romero Masiá e Emilio Grandío Seoane profundarán no destacado legado intelectual que deixou na súa obra. O encontro finalizará cunha interpretación da violonchelista Margarida Mariño, que interpretará a Sarabande da Suite III de Bach e mais versións de Negra sombra e Lela.
