Entrega da Rosa de Galicia ao fillo de Xosé Ramón Barreiro. Fonte: Fundación Rosalía
A Fundación Rosalía de Castro celebraba este sábado 17 os seus 50 anos de actividade na Casa da Matanza de Padrón. No marco desta conmemoración, a entidade outorgoulle de xeito póstumo o seu galardón Rosa de Galicia ao historiador e antigo presidente da Real Academia Galega Xosé Ramón Barreiro. O fillo de Barreiro, Álvaro, recolleu a insignia das mans do presidente da Fundación Rosalía, Anxo Angueira, nun acto no que o escritor Xosé Luís Méndez Ferrín fixo unha laudatio do homenaxeado.
A Rosa de Galicia é unha insignia que concede a Fundación "a persoas ou institucións que se significaran na defensa da figura da escritora ou na promoción do legado rosaliano". Trátase dunha insignia de ouro con deseño de Pepe Barro.
