O parque Compostela Rupestre comeza a executar as accións programadas

O concello de Teo acordou onte a xuntanza dos representantes municipais dos cinco concellos que conforman o Parque Compostela Rupestre. Os concelleiros de Ames, Brión, Santiago de Compostela, Teo e Val do Dubra acordaron comezar as accións prácticas de posta en marcha do parque sinaladas no plan director do proxecto. Deste xeito, licitarán de maneira conxunta a limpeza e o mantemento de todos os conxuntos de petróglifos cos que se traballará, ademais de implementar un sistema de xeolocalización e fichas de catalogación. Tamén se acordou a adquisición das fincas nas que se atopan as estacións de arte rupestre do monte Piquiño, en Teo, a través da fórmula da expropiación, por 50.000 euros e a creación do CIRVI (Centro de Interpretación Rupestre de Villestro), acondicionando a antiga escola deste lugar do concello de Santiago, por un custe de 150.000 euros.