O Museo de Arte Contemporánea de Vigo (MARCO) contará este ano con máis recursos para desenvolver a súa actividade. O Concello de Vigo anunciaba esta semana que incrementa a súa achega económica ao centro en 120.000 euros, co que suma 795.000 para este ano.
Canda a esta institución, tamén medran os apoios ao museo de parte da Deputación, que incrementa a súa achega en 15.000 euros e do Ministerio de Cultura, que porá 10.000 euros máis, segundo adiantou o alcalde vigués Abel Caballero. A achega do goberno local pretende apoiar a celebración da grande exposición coa que se conmemorará o Ano Laxeiro na cidade, e que terá no MARCO o seu centro.
