O Parlamento e AFundación colaborarán no eido cultural

O presidente do Parlamento de Galicia, Miguel Ángel Santalices Vieira, e mailo presidente de Afundación, Miguel Ángel Escotet Álvarez, asinaron un protocolo que articula a colaboración entre ambas para a promoción e divulgación dos seus fondos artísticos, e tamén para o desenvolvemento de actividades culturais de diferente índole. O acordo, que terá unha duración inicial dun ano, prorrogable, contempla a intensificación da promoción das dúas coleccións de arte e o intercambio de fondos artísticos. Tamén se contempla a colaboración no ámbito da investigación e a promoción do patrimonio histórico e cultural de Galicia. O 40 aniversario do Parlamento de Galicia aproveitarase para intensificar a colaboración entre a Cámara galega e a Obra Social de ABANCA para actividades relacionadas con esta conmemoración.