Colección de arte. Parlamento de Galicia é o título do catálogo que dá conta da extensa colección de pezas que atesoura esta institución. O presidente da cámara, Miguel Ángel Santalices Vieira, presentaba onte o volume que recolle "unha das máis variadas e valiosas coleccións de arte galega contemporánea". A institución conta con máis de 300 obras que inclúen sobre todo pintura e escultura pero que tamén comprende fotografías, documentos, reposteiros, vidreiras ou medallas. Datadas entre o século XX e o XXI, parte das mesmas son propiedade da Cámara e outras atópanse en depósito. O catálogo está dispoñible en liña.
Segundo adiantou Santalices, o catálogo presentado fai parte dunha "estratexia máis ampla que inclúe a catalogación, xestión, ordenación e conservación da colección seguindo criterios museísticos, labor para a que a Cámara conta co asesoramento da Real Academia Galega de Belas Artes", segundo adianta o web do Parlamento.
