O ensanche dunha pista en Lalín deixa visibles dúas estacións de arte rupestre

Un conxunto de petróglifos de Bermés estiveron a piques de ser desaloxados por segunda vez da súa localización pola construción dun camiño. Trátase de cando menos dúas laxes que xa foran crebadas para ampliar ou anchear un antigo camiño, e que se atopaban na beira dunha pista que ía ser ampliada recentemente na parroquia de Bermés (Lalín). Varios veciños da parroquia decatáronse de que as pedras tiñan un certo número de coviñas e contactaron co experto local Daniel González-Alén, que se decatou da importancia do conxunto de gravuras, que consisten sobre todo en coviñas conectadas por canles e combinacións circulares. Segundo González-Alén, o estilo das gravuras é similar a outras estacións da comarca. Daniel González-Alén reclamou ao concello que paralice as obras e proceda coa Dirección Xeral de Patrimonio.