Héctor Cajaraville achega a figura de Florencio Delgado ao público máis novo

Continúan as propostas editoriais arredor do autor homenaxeado no Día das Letras Galegas deste 2022. Desta volta é Héctor Cajaraville o autor de Florencio Delgado Gurriarán. Polos vieiros da saudade, unha obra que achega a figura do valedorrés ao público máis novo. Publicada na colección Merlín de Edicións Xerais, a obra conta con ilustracións de Antía Antepazo para repasar a traxectoria vital e literaria do homenaxeado adaptada para lectoras e lectores a partir dos 11 anos.

Cajaraville engade ao traballo biográfico a creación literaria, ao engadir ao final de cada capítulo, un poema propio no que tenta emular o xeito de escribir de Delgado Gurriarán en cada unha das súas etapas artísticas. A obra inclúe ademais fotografías do autor e fragmentos da súa obra poética.