Foto: Xunta de Galicia
O mosteiro de San Martiño Pinario conta cun pavillón historicista do século XIX nas zonas abertas do interior do mosteiro que será rehabilitado dentro das liñas do plan director establecido para o conxunto monástico. O conselleiro de Cultura, Román Rodríguez, e o reitor de San Martiño Pinario, Carlos Álvarez, presentaron a seguinte fase das iniciativas de posta en valor do gran mosteiro comnpostelán. A rehabilitación do pavillón, que se fará con cargo parcial ao 1,5% cultural, recuperará a tipoloxía construtiva orixinal, liberaranse espazos ocupados polas construcións de tixolo recentes e recuperarase a estrutura de ferro fundido, as tesoiras de madeira e os muros que a sosteñen, dándolle un peche transparente e diáfano e unha entreplanta para diferenciar superficies.
