O Museo de Lugo presenta dúas mostras no marco da reivindicación das mulleres do rural

Seguindo co programa "Mulleres rurais", que se ven desenvolvendo na Rede Museística da Deputación de Lugo desde o pasado mes de outubro, o Museo Provincial acolle xa as mostras "Recolectoras: Memoria e Terra" e "Proximidade Llunyana". As dúas manteñen o obxectivo deste programa de situar a mulleres que viven no rural no centro de procesos creativos.

"Recolectoras. Memoria e Terra", comisariada por Alexandra R. Rey, recolle as creacións realizadas por 69 mulleres que viven no rural en obradoiros e encontros coas artistas María Gar, artista gráfica e instalativa; Ana Gesto, artista visual e perfomance; Isabell Seidel, pintora; e Andrea Torres, en diferentes emprazamentos, desde os propios domicilios das participantes ata espazos cedidos por outros colectivos. Trátase de fotografías con composicións determinadas polos relatos das protagonistas, serigrafías e pezas cerámicas que as participantes realizaron acompañadas polas artistas, que lles facilitaron os recursos e as indicacións técnicas, e inspiradas nas súas traxectorias vitais, vinculadas ao rural.

Diálogo entre mostras
As pezas de "Recolectoras" dialogan coa documentación, as fotografías e os obxectos recompilados no marco do proxecto Proximidade Llunyana, que pretende plasmar a emigración de Lugo a Barcelona no século XX, representada polo testemuño de mulleres. Unha morea de maletas no centro da sala, un panel fotográfico do Shanghái, o tren encargado de transportar as viaxeiras á terra prometida, e documentación achegada por familias que viviron o éxodo rural da posguerra -fundamentalmente cartas e fotografías- reciben á persoa visitante no refectorio do Museo. A xerente da Rede Museística, Encarna Lago, lembrou que se trata dun proxecto aberto á incorporación de materiais e relatos achegados por outras persoas e familias emigrantes.