Co título de Mulleres que viven soas, a compañía Berrobambán acaba de pór na rede un podcast de dez episodios que "recollen experiencias de mulleres diversas en xeración e percorrido vital". A compañía conta coa locución de Xiana Arias e a gravación de Berio Molina para este proxecto, "un mosaico de voces, de experiencias, coas que sabermos que hai diferentes maneiras de construír un fogar". A proposta que se pode escoitar na plataforma Podgalego é tamén a base do vindeiro espectáculo da compañía.
Segundo adiantan, a montaxe mesturará historias reais e ficción coa intención de "acadar un contraste entre a realidade e as habituais fórmulas de retratar as mulleres que viven soas por parte da ficción, a literatura, a narración oral ou o audiovisual ao longo da historia". Paula Carballeira, Vero Rilo e María da Pontragha protagonizarán esta iniciativa.
Canda a este proxecto, Berrobambán está tamén a publicar na rede o podcast do seu proxecto Facer memoria. Esta iniciativa brindoulle voz ao público a posibilidade para contar dende un escenario as súas lembranzas en actividades que se desenvolveron o pasado outono nos concellos de Mañón, Teo, Carballo e Outes. Entrevistas individuais, xuntanzas abertas, reunións con escolares ou un encontro-espectáculo serviron como base para elaborar o material que agora se pode seguir en Podgalego.
