As itinerancias e Internet incrementaron a cifra de visitantes da Cidade da Cultura

A Cidade da Cultura fixo balance do número de participantes nas súas actividades culturais. Ao longo de 2021 case 230.000 persoas participaron do programa cultural do edificio, o cal supón un incremento, segundo a Xunta, dun 20% con respecto a 2019, antes da pandemia. O goberno explícao a partir do programa de itinerancias das exposicións producidas polo centro e que chegaron a diferentes cidades galegas, polo enorme éxito da exposición Faraón, rei de Exipto, que acadou a cifra máis elevada de exposicións da Cidade da Cultura en toda a súa historia, con 77.000 persoas, e polas accións en liña levadas a cabo pola entidade para compensar as dificultades da situación de pandemia. A Cidade da Cultura sinalou tamén o elevado número de eventos externos celebrados nestas instalacións -380-. Os datos confirman "a tendencia á alza que mantén a Cidade da Cultura desde a súa inauguración, só interrompida durante o ano do confinamento", sinalan desde a propia web do equipamento.