Galaxia publica A historia do cómic en Galicia

Desde os autores pioneiros do século XIX ata os máis novos exemplos da novena arte no país. Octavio Beares, investigador, crítico e comisario acaba de publicar na editorial Galaxia A historia do cómic en Galicia, unha publicación na que compila o percorrido da banda deseñada galega. A obra preséntase ao público este 17 de decembro na libraría Cartabón de Vigo nun acto que se desenvolverá a partir das 20h e no que o autor estará acompañado da divulgadora da BD Neves Rodrígurez.

A partir de traballos fundacionais como As orixes do cómic galego de Rosario Crespo, Os pioneiros da banda deseñada galega, 1971-1979 de Xulio Carballo Dopico, textos de Carlos Portela ou Breixo Harguindey, ou de contidos publicados no Soportal BD de Culturagalega.gal, o autor sistematiza ao longo de 128 páxinas a evolución dos nosos cadriños, a dedicarlle un capítulo específico a un autor tan senlleiro como é Miguelanxo Prado.

O traballo bibliográfico compleméntase con entrevista a diferentes artistas e editoriais deste sector, a achegar unha cronoloxía que recolle os grandes fitos da arte e os nomes máis destacados que a impulsaron ao longo a súa evolución ata o ano 2020.