Traducen ao galego a BD Como estudar o cómic

Co subítulo "Unha introdución gráfica ao estudo da banda deseñada", o servizo de publicacións da Universidade da Coruña acaba de tirar á luz a obra Como estudar o cómic. Este proxecto amosa, a empregar a propia linguaxe dos cadriños, as claves da novena arte, "os seus principais recursos e as principais tradicións históricas", e permite "descubrir como funciona o deseño editorial e os métodos de distribucións da súa industria". O investigador Xulio Carballo correu coa edición deste traballo, publicado orixinalmente pola Universidade de Oxford e realizado por Enrique del Rey Cabero, Michael Goodrum e Josean Morlesín Mellado.

De xeito paralelo, Xulia Pisón acaba de presentar o terceiro volume de Microalgas, unha serie que nacera tamén da man da Universidade da Coruña. Máis alá da terra leva a os seus amigos a Marte, "un planeta que alberga a última esperanza para a humanidade" no que enfrontarán diferentes aventuras. A obra ve a luz nunha tripla edición en galego, castelán e inglés.

A editorial Galaxia, pola súa banda, tirou do prelo Sentinelas da lúa carmesí, asinada por Alexandre Senande, Ozo Perozo e Andrés Castro. Nesta obra de xénero fantástico para público xuvenil o grupo protagonista tentará integrar de novo o mundo dos seres míticos e o dos humanos. O título súmase a outros lanzamentos recentes da firma como Os ollos do irmán eterno. Este volume traduce ao galego a adaptación que Borja Pérez realizou da novela homónima de Stefan Zweig. Tamén está a chegar ás librarías A brigada iridiscente, a historia dun grupo de crianzas que se atopan atrapadas nun labirinto de atracción inchables.