Sitting piece for 2. Fonte: Deputación de Ourense.
O xurado da XVI edición do Certame de Artes Plásticas da Deputación de Ourense seleccionou a escultura Sitting piece for 2 da boirense Andrea Dávila como vencedora do certame. A artista impúxose con este traballo entre os máis de quiñentos traballos que se presentaron ao premio e recibirá 3.000 euros en metálico. O segundo premio, dotado con 2.000 euros, foi o vigués Alberto Ardid de Cabo pola obra Nova riqueza, mentres que o terceiro galardón, de mil euros, recaeu na ourensá Mar Ramón Soriano pola peza en cerámica titulada Desnudo, espacio de juego.
O xurado estivo integrado por Santiago Olmo, director do Centro Galego de Arte Contemporánea (CGAC); Juan Carlos Román, artista e profesor na Facultade de Belas Artes de Pontevedra; Ángel Cerviño, creador e comisario de exposicións; Eva Torres, directora do Museo Municipal de Ourense; e Rosendo Cid, creador e comisario de exposicións. Como secretario exerceu o director do Centro Cultural Marcos Valcárcel, Francisco González. Os premios entregaranse o vindeiro mes de xaneiro no acto inaugural da exposición que amosará os traballos seleccionados polo xurado.
