O Museo de Pontevedra inaugura mañá xoves 2 de decembro a exposición "Castelao en Europa. A viaxe de 1921". A exposición, comisariada por Ángeles Tilve, responsable de Coleccións do propio Museo de Pontevedra, permite explorar o contido do "excepcional manuscrito orixinal" no que Castelao deixou constancia da súa viaxe por Francia, Bélxica e Alemaña. Aló foi en 1921, pensionado pola Junta de Ampliación de Estudios (JAE) para coñecer a tradición artística europea e as vangardas. A visita tivo un gran impacto na posterior obra de Castelao. A exposición permite ver as reproducións dos 131 debuxos do manuscrito, fotografías, tarxetas postais, recortes e impresos que Castelao foi intercalando no texto. A mostra permanecerá aberta ata o 23 de xaneiro.
