O circo toma Santiago coa suma de Circo a Escena e D10!

Santiago acolle desde esta semana dous eventos enxergados entre si e coas artes circenses coma base: a programación Circo a Escena e máis o Encontro para a formación e a innovación no circo D10!. Así, durante esta última semana de novembro a capital galega convértese no referente circense estatal, ofrecendo actividades de tanto de exhibición como de formación dirixidas a públicos xerais e profesionais. A colaboración interinstitucional co sector circense fai posible que se realicen esta xeira de actividades, organizadas dese a compañía Pistacatro e co apoio de institucións de todos os niveis: do Estado co apoio do INAEM e a Rede Nacional de Teatros e Auditorios, do Autonómico co apoio da AGADIC e o Centro Dramático Galego e do local co apoio do Concello de Santiago e do Auditorio de Galicia.

No marco do Encontro para a formación e a innovación no circo D10!, o escenario do Centro Dramático Galego (CDG) no Salón Teatro acolle os vindeiros días 24, 25 e 26 tres espectáculos deste xénero abertos ao público e mais o obradoiro de dramaturxia no circo Escribir o risco, que terá lugar no compostelán Centro Sociocultural do Romaño. A primeira das exhibicións no Salón Teatro terá lugar o mércores 24, ás 20,00 h., con 'Mi nombre es Hor', da compañía catalá PSIRC, baseada artisticamente na poética da imaxe que se artella a través das técnicas de circo e os monicreques. Na xornada do xoves, á mesma hora, será a quenda da compañía Madame Gaüc, tamén procedente de Cataluña, co espectáculo 'Fil', que explora as relacións humanas a partir dunha linguaxe universal: a física. O venres ás 19,00 h. chega de Andalucía La Víspera, con 'Murmullo'. Trátase dunha montaxe que convida o público a mergullarse no concepto que lle dá nome, establecendo un diálogo artístico cos intérpretes e os diferentes elementos que compoñen a escena. É unha peza de circo, danza contemporánea, manipulación de monicreques e música en vivo.

Completando Circo a escena
O programa impulsado polo Concello de Santiago Circo a escena, inclúe entre estas actuacións e outras dúas no Auditorio de Galicia, un total de 7 espectáculos dirixidos a público adulto e a público familiar en diferentes formatos. Así no Teatro Principal poderá verse 'Suspensión' da Compañía Nueveuno de Madrid, o 26 de novembro; o Auditorio de Galicia acollerá o espectáculo 'Yolo' dos valencianos Compañía Lucas Escobedo o 27 de novembro e ao día seguinte será a quenda no mesmo sitio da Compañía Manolo Alcántara. Premio Nacional de Circo 2021 coa súa montaxe 'Deja vú'. Ademais destas propostas, o encontro D10! ofrece a exhibición de danza vertical 'Vértigo' no Centro Galego de Arte Contemporánea o 27 de novembro ás 13,00 horas, ou o obradoiro de malabares expresivos a cargo de Guillaume Martinet, os días 25 e 26 na Cidade da Cultura de Galicia.