Músicas ao Vivo declárase desconforme coas bases do circuíto de concertos do INAEM

A asociación Músicas ao Vivo (MAV), en representación dos intérpretes galegos a ela vencellados, ven de expresar a súa desconformidade coas bases do circuíto estatal Girando Por Salas (GPS) que promove concertos por toda España co patrocinio do Instituto de las Artes Escénicas y de la Música (INAEM) do Ministerio de Cultura e Deporte. A entidade galega comunicoulle esta disconformidade á organización de GPS, na que están presentes varias asociacións de diferentes partes da industria musical, respecto ao requisito obrigatorio a grupos ou artistas de ter o seu último traballo publicado en plataformas dixitais concretas (nomeadamente Spotify ou Deezer) paras poder acceder á convocatoria do ciclo, rexeitando aquelas nas que é o propio artista, sen intermediarios, o que pode difundir a súa obra (Soundcloud ou YouTube, nomeadamente). Desde MAV manifestáronlle á organización a retirada dese punto das bases entendendo que "non ten sentido" ao non responder, segundo eles, a criterios de calidade ou profesionalidade e entendendo que ese requisito "non debe ser motivo polo que un bo proxecto quede fóra, máis aínda cando se trata dun circuíto apoiado con diñeiro público". MAV sinala que debido a ese punto das bases "xa se rexeitaron proxectos de gran valía simplemente por non participar do negocio das grandes plataformas dixitais".