Inauguración da exposición. Foto: Cidade da Cultura
Jorge Castillo (Pontevedra, 1933) é un dos artistas galegos con máis proxección internacional. Ademais da súa faceta máis coñecida como pintor, a súa produción escultórica é tamén moi notable e extensa. Onte a Cidade da Cultura inaugurou unha mostra que percorre seis décadas de produción escultórica de Castillo, incluíndo obras recentes de gran formato, pezas en bronce e aceiro e arxilas dos últimos anos. Ademais, inclúense pezas complementarias, como lenzos, augafortes e cadernos de viaxe. A traxectoria de Castillo inclúe estadías e traballos en Bos Aires, Nova York ou diferentes países europeos e cidades españolas. Hoxe, a súa obra atópase en institucións internacionais como o Carnegie Institute, o San Francisco Museum of Modern Art, o Albertina Museum, a Fundación Juan March, o Museo de Belas Artes de Vitoria ou a Nationalgalerie de Berlín. A mostra está comisariada por Rosario Sarmiento e pode visitarse no Museo Gaiás ata o vindeiro 20 de febreiro de 2022.
