O concello de Rianxo presentou ás comunidades de montes un plan de mantemento e limpeza dos sitios arqueolóxicos do concello durante tres anos. Coordinados polo arqueólogo Mario César Vila e con medios municipais, limparase toda unha zona cunha especial densidade de xacementos, en especial petróglifos e mámoas. Abrangue a área montañosa que vai de Leiro e Isorna ata Asados e inclúe diferentes e emblemáticas estacións de arte rupestre. O obxectivo non é só facer visibles estes sitios arqueolóxicos senón protexelos contra os lumes, que provocan grandes afeccións neses espazos. Para que o plan sexa posible, cómpre o permiso dos propietarios dos bens arqueolóxicos. Non é frecuente que os concellos habiliten planes de varios anos de duración para o mantemento de sitios arqueolóxicos de propiedade privada ou en mancomún.
