Recuperan un astrolabio singular na ría de Viveiro

Se onte publicabamos a nova de que un equipo subacuático traballaba na exploración da fragata Magdalena afundida na ría de Viveiro, hoxe os investigadores deron a coñecer un achado singular: un astrolabio datado a finais do XVI ou principios do XVII. Trátase dun instrumento para facilitar a orientación dos buques en alta mar. O astrolabio non correspondería á fragata Magdalena, afundida en 1810, senón a outro buque afundido a finais do XVI, do que se descoñece o seu nome. O xacemento coñécese como 'Viveiro 1' e os arqueólogos cren que pode estar vinculado co achado de dous canóns dese mesmo periodo na praia de Areas. Segundo o arqueólogo Antón López, o atrolabio estaría datado entre 1575 e 1622 e sería o primeiro deste tipo achado en Galicia e o 108 de todos os documentados ata o momento no mundo. O artefacto é de bronce, mide 21 centímetros e pesa case cinco quilos. Ten características formais que o diferencian dos da súa clase e será trasladado ao Museo do Mar de Vigo.