Cuarta campaña para explorar a fragata Magdalena afundida na ría de Viveiro

Especialistas subacuáticos están xa a traballar na zona de afundimento da fragata Magdalena, naufragada na ría de Viveiro en 1810 xunto co bergantín Palomo, cun total de 550 mortos. A fragata é un xacemento privilexiado para coñecer a mariña española de principios do século XIX, e por iso é xa a cuarta campaña de exploración do buque, que inclúe a recuperación da materialidade do mesmo e o seu tratamento nun local cedido polo Seminario de Estudos Terra de Viveiro. O obxectivo da Federación Española de Actividades Subacuáticas (FEDAS) é estudar o alcance do xacemento, descuberto en 2018, para poder determinar as intervencións arqueolóxicas do vindeiro ano.