Reflexións sobre boas prácticas nos eventos culturais

A Asociación Galega de Profesionais da Xestión Cultural (AGPXC) vai desenvolver durante o mes de setembro a programación ‘Boas Novas no Camiño’, unha iniciativa divulgadora enmarcada no programa 'O Teu Xacobeo' da Xunta de Galicia que ten como obxectivo crear sinerxías e espazos de diálogo entre prácticas culturais galegas e proxectos de obxectivos similares que se desenvolven noutros países europeos como Portugal, Francia, Dinamarca, Italia ou Reino Unido. Serán en total catro xornadas nas que se tentará dar resposta ás necesidades culturais dos territorios, a través do coñecemento e a análise de experiencias de proxectos relevantes e sustentables, enmarcados dentro dos parámetros das boas prácticas culturais. co obxectivo de poñer en valor as iniciativas culturais presentes nos diferentes traxectos do Camiño de Santiago.

Estas xornadas, que comezarán este venres en Lugo e terán lugar nos seguintes venres de setembro, presentáronse hoxe no Consello da Cultura Galega contando coa asistencia de Dolores Vilavedra, secretaria do CCG; Pilar Portela, presidenta da Asociación Galega de Profesionais da Xestión Cultural; Cecilia Pereira Marimón, comisaria do Xacobeo 2021 ; Belén Bermejo, directora do Festival Espazos Sonoros; e Samuel Diz, director artístico de Música no Claustro. Nos encontros, que terán lugar Lugo, Tui, Ribadavia e Betanzos reuniránse expertas e expertos internacionais e galegos para reflexionar sobre sustentabilidade e profesionalización en diferentes tipos de programas, con perspectivas de eventos diferentes e os xeitos de dotalos de valor cultural, máis alá das celebracións de ocio, así como do uso das cidades como escenarios ou os xeitos de xestionar os espazos patrimoniais para a programación cultural.