Desde o pasado 9 de agosto e ata o vindeiro día 15, a vila de Ordes acolle a XIV edición do festival DesOrdes Creativas. O encontro de arte urbana conta desta volta coa participación dos artistas galegos Sekone e Sokram aos que se suman os nomes internacionais da sevillana Ana Lanhegeldt, o ucraíno Aec Interesni Kazki e a arxentina Milu Correch.
A cita prescindiu nesta xeira das actividades paralelas habituais como concertos, conferencias, obradoiros e clases maxistrais por mor da pandemia de Covid-19. Mantense no entanto a visita guiada por parte dos 80 murais xa presentes na vila para o sábado 14. Ademais, o web do festival transmite vía streaming o proceso de elaboración das cinco novas obras desta edición.
