Por segundo ano, as rúas de Carballo converteranse nun foco de creación artística. O Rexenera Fest volta á vila do 30 de maio ao 5 de xuño para amosar as posibilidades da arte na recuperación da paisaxe urbana. Nesta ocasión o evento conta con Case Maclaim (Alemaña), Hyuro (Arxentina), No3l (Galiza), Natalia Rak (Polonia) e Isaac Mahow (España) como convidados. Ademais de realizar cadanseu mural xigante, no programa inclúense clases maxistrais como a impartirá Sekone sobre o realismo no graffiti ou a de Cestola na Cachola, que abordará a introdución ao muralismo. Unha mesa redonda reunirá diferentes iniciativas arredor do grafiti coa participación de Lara Seixo, Derrubando Muros con Pintura, DesOrdes Creativas e o Festival Asalto. Familia Caamagno e Fluzo correrán coa parte musical do programa.
