Carballo aposta pola arte urbana no Rexenera Fest

Desde o pasado día 1 e ata o vindeiro 7 de xuño, cinco muralistas de recoñecido prestixio internacional están a levar as súas creacións a Carballo. A vila celebra así o seu I Rexenera Fest, un proxecto dedicado á arte pública que conta nesta xeira con traballos de Aryz, Bordalo II, Dulk, Nömada e Pixel Pancho. As pinturas aplicadas en muros e medianeiras da vila pretenden achegar a arte ao público, na liña de experiencias anteriores como Derrubando muros con pintura, tamén en Carballo, ou o DesOrdes Creativas, que se desenvolve desde hai anos en Ordes.

Ademais das artes plásticas, tamén haberá espazo para a música, cun concerto duplo o vindeiro 6 de xuño, cando a sala Dublín acollerá Xenderal & Check Selectah e mais A Magnifique Bande dos Homes sen Medo.