Nova Galega de Danza é finalista a dous Premios MAX

O comité dos Premios MAX de Artes Escénicas, organizados pola Fundación SGAE, acordou que o espectáculo Leira da compañía Nova Galega de Danza acadase dous postos de finalista nas sete categorías ás que tiña opcións. A montaxe resulta así unha das tres finalistas estatais ao premio ao Mellor Espectáculo de Danza, e o bailarín Iván Villar é tamén un dos tres finalistas a Mellor Intérprete masculino de Danza pola súa participación no espectáculo galego.

Leira é unha "coreografía humana de apeiros de labranza, de corpos que cargan e arrastran, que danzan entre os sucos arados na terra", segundo explica a compañía. Jaime Pablo Díaz corre coa dirección artística dun espectáculo que integra a voz de Rosa Cedrón coa danza de Inés Vieites, Estefanía Gómez, Iván Villar, César Louzán, Pablo Sánchez, Ricardo Fernández e Uxía Rivas sobre música composta por Sergio Moure de Oteyza. Fóra da quiniela de finalistas quedaron o resto das categorías ás que optaba Leira e outras cinco producións galegas que optaban, entre todas a 17 candidaturas na fase anterior do certame, que dando finalmente só nestas dúas. Os gañadores coñeceranse na gala de entrega dos Premios Max o 4 de outubro no Teatro Arriaga de Bilbao.