A enxeñería 3D do papel

Antes da existencia do mundo dixital e as súas aplicacións sobre realidades virtuais, mesmo antes da existencia da captura fotográfica e audiovisual das imaxes, xa existía un tipo de enxeñería do papel precursora do 3D que facía cobrar volume e movemento tanto a elementos reais coma fantásticos ante os nosos ollos. Os libros con elementos móbiles ou despregables, que na actualidade seguen a existir, gardaban nas súas páxinas sistemas tridimensionais traballados ao detalle para levantarse desde as súas páxinas e ocupar un espazo ante a nosa mirada. Estes libros con elementos móbiles e despregables estiveron durante séculos dedicados a disciplinas coma a medicina ou a astronomía ata que, na segunda metade do século XVIII, atoparon a súa vocación lúdica ao apareceren as primeiras publicacións con imaxes despregables concibidas unicamente como entretemento. No edificio Castelao do Museo de Pontevedra pódese ver estes días, desde o pasado 29 de xullo, a exposición Pop-up, centrada nestes curiosos volumes da historia da edición e da ilustración.

Ata 2.400 libros móbiles e despregables atesoura a colección reunida polo matrimonio formado polos palentinos Ana María Ortega Palacios e Álvaro Gutiérrez Baños da que xurde esta mostra. Unha selección de 90 pezas feita sobre este fondo é a que pode visitarse nas salas do museo pontevedrés ata o vindeiro 12 de outubro. Esta mostra, que comeza cun volume de 1612, permitirá ás persoas que a visiten coñecer a historia, a técnica e a temática destas curiosas publicacións que desafían o formato convencional e introducen entre as súas páxinas elementos mecánicos que converten as ilustracións en xogos interactivos que convidan a accionar algún mecanismo ou a observalos desde distintos ángulos, que se dá a coñecer coma "enxeñería do papel".