Imaxe da presentación da Furgoteca
Desde a súa posta en marcha en marzo de 2023 a Furgoteca, o servizo de bibliotecas móbiles da Xunta de Galicia, recibiu 12.050 visitas ao longo das súas rutas por 20 concellos rurais das provincias de Lugo e de Ourense. Segundo fixo público a Consellería de Cultura, en total, estas furgonetas realizaron ademais un total de 11.665 préstamos de libros, películas, música, xogos e publicacións periódicas. O programa completouse nestes meses con 300 actividades de dinamización ás que acudiron 5.483 asistentes.
Ademais, o secretario xeral de Cultura, Anxo M. Lorenzo, anunciou que neste 2024 a actividade ampliarase cunha terceira ruta que sumará 10 novos concellos ourensáns aos itinerarios da furgoteca. Lobeira, Muíños, Padrenda, Porqueira, Quintela de Leirado, Rairiz de Veiga, Ramirás, Sandiás, Sarreaus e Verea serán as novas localidades que recibirán as visitas deste servizo.
