Pandemias de papel

A Deputación de Pontevedra acaba de publicar a exposición virtual "Pandemias no século XIX", na que expón documentación de todo tipo preservada no Arquivo da institución desde mesmo antes da súa constitución como organismo en 1836. A exposición permite coñecer o precario investimento público na xestión de epidemias, de aquela bastante frecuentes debido ás malas condicións sanitarias. Sanatorios, institutos de saúde, medidas de contención das pandemias, folletos con información hixiénica ou informes médicos. En particular, a exposición detense na epidemia de 1833-1834, co cólera procedente de Asia Central cunha tripulación de soldados belgas, e a epidemia de febre tifoidea de 1853-1855, derivada dos ciclos de fame e malas colleitas.