O Museo de Pontevedra premia catro Novos Valores da arte

Rebeca López Villar, coa peza 'Sen Título (Sobre paseos e arrepentimentos)', Adrián Solleiro con 'Reflexión', Diego del Río con 'Ras Al Hanout II' e Daniel Cerecedo con 'Picasso y Richter (después de)', foron as persoas merecedoras das bolsas do certame Novos Valores na súa edición de 2021 do Museo de Pontevedra. As tres creacións pictóricas e a escultórica foron elixidas por unanimidade polo xurado grazas á súa calidade, presentando "cargas conceptuais e reflexións importantes, ademais de ser variadas na súa temática", segundo explicou o director do Museo, Xose Manuel Rey. As catro obras formarán parte da exposición que terá lugar entre o vindeiro xoves 8 de xullo e o 12 de setembro no Edificio Sarmiento do Museo xunto a outras dez pezas elixidas como as mellores das 29 presentadas.

En canto ao destino das bolsas dotadas con 7.500 euros. Rebeca López ten intención de continuar a formación artística vencellada coa xestión e a redacción cultural a través da realización dalgún mestrado. Adrián Solleiro a usará para continuar co proxecto iniciado coa obra gañadora, e tamén para formarse grazas a cursos sobre anatomía aplicada á escultura, pintura con aerógrafo, procesos técnicos da escultura ou incluso sobre electrónica e robótica, cuestión que considera interesante para incorporar ás súas pezas. Diego del Río Comesaña (Ferrol) fará grazas a ela varias viaxes de formación, coma unha estancia de investigación na Academia di Belle Arti di Brera (Milán) a finais deste ano, unha residencia artística no Shangyuan Art Museum de Pekin durante tres meses aínda por determinar, e tamén unha na Residencia Corazón de Bos Aires. Finalmente, o destino da bolsa de Daniel Cerecedo Bretal (A Pobra do Caramiñal) será formalizar a matrícula no programa de Doutoramento en Creación e Investigación en Arte Contemporánea (na Facultade de Belas Artes de Pontevedra), así como custear os gastos derivados destes estudos.