Unha carpa na Praza da Ferraría acolle entre os días 2 e 4 de xullo a Festa dos Libros de Pontevedra. A cidade continúa con este formato propio de celebración da lectura, que conta con catorce librarías locais. Fronte á renuncia das Feiras do Libro que organiza a Federación de Librarías por todo o país, este evento aposta pola celebración de actividades e suma ás sinaturas de exemplares presentacións, mesas redondas, concertos, recitais, contacontos ou obradoiros.
Deste xeito, no programa inclúense actuacións diarias para público infantil, concertos e recitais poéticos a rematar cada unha das xornadas e múltiples presentacións e sinaturas. A autora Najat el Hachmi, premio Nadal 2021, preséntase como autora convidada desta xeira, na que, como novidades, desenvólvese na tarde desde dous de xullo un encontro con Eva Mejuto, que é recoñecida como traxectoria destacada deste ano.
Tamén se estrea a sección Libros do Trinque, que reúne na Libraría Paz o público con autores que acaban de lanzar obras nestes días. Nesta xeira, serán Xabier Quiroga e Lorena Conde os protagonistas dos encontros. Mesas redondas sobre ilustración, Xela Arias ou a novela negra en Galicia súmanse á nova sección De... A... que nesta ocasión amosa como chegaron á literatura desde o xornalismo as autoras Ana Cabaleiro, Lara Dopazo e Sara Vila.
