Fotograma de Sycorax / Fílmika Galaika
A curtametraxe Sycorax co-dirixida por Lois Patiño e o cineasta arxentino Matías Piñeiro foi seleccionada polo comité da Quincena dos realizadores / Quinzaine des Réalisateurs, a sección independente do Festival de Cannes que selecciona as cinematografías máis singulares e visionarias. O filme exhibirase o vindeiro 13 de xullo dentro da programación desta selección paralela ao festival francés e pola que no seu momento pasaron outras producións con selo galego coma Decorado (2016) de Alberto Vázquez e a ópera prima de Óliver Laxe Todos vós sodes capitáns (2010).
Sycorax, é unha coproducción de Filmika Galaika coa portuguesa Bando à Parte, baseada libremente na obra de Shakespeare A tempestade e rodada nas illas Azores. A curtametraxe conta co laureado director de fotografía Mauro Herce ( gañador do Mestre Mateo e do Goya polo seu traballo en Lo que arde) e as actrices Agustina Muñoz, Diana Diegues e Susana Abreu. A colaboración entre o vigués Lois Patiño e o arxentino Matías Piñeiro manterase tras esta curtamentraxe extendendose na elaboración dunha vindeira longametraxe de semellante inspiración shakespiriana de título Ariel, que agardan comezar a rodar no vindeiro ano 2022.
