Inauguración da exposición. Foto: Concello de Allariz
O concello de Allariz iniciou este venres, coa inaguración dunha mostra de artistas e artesáns locais, a programación do décimo aniversario do inicio das intervencións arqueolóxicas no xacemento galaicorromano de Armea. A mostra, titulada "Armea, a visión dos artistas locais", presenta vinte olladas artísticas sobre este enclave histórico alaricano. A programación tamén contará cunha exposición urbana con lonas polas rúas dando conta dos achados do proxecto, que supón segundo os investigadores, a "maior trama urbana da Galicia romana despois de Lugo", e cun roteiro polo contorno da parroquia de Santa Mariña de Augas Santas cos seus principais elementos arqueolóxicos e culturais. As escavacións en Armea retomaranse a principios de xullo.
